樓價居高橫行，上車甚艱難，上到車都隨時撻定，啱啱外訪回港嘅財政司司長曾俊華話，外國環境波動相當大，美國已講咗今年加息可能性非常高，加上香港嘅樓宇供應增加，各方面都導致價錢上調整，聽清楚吖，係調整咋，佢強調有需要時會調整政策。
對於即將嚟嘅內地十一黃金周，業界預期旅客同人數都會跌，鬍鬚曾話，其實年初政府已透過預算案畀咗錢旅遊、零售界，如果當時冇咗呢筆錢，情況會仲差；至於明年係咪繼續有得派錢畀業界，鬍鬚曾即時霸氣回應：「明年嘅預算案明年先算。」
暗寸適度有為論
鬍鬚曾嘅霸氣回應唔止咁，佢噚日喺網誌仲有意無意咁寸爆特首梁振英「適度有為」，佢話支援唔同業界發展都係政府責任，如果要從干預或者不干預嘅角度探討，最實際都係以香港社會整體利益為前提，找適當平衡，實事求是地作出抉擇，擺明就係唔會一味干預啦，唔知CY聽唔聽得出言外之意？