隔牆有耳:深水埗明哥街頭彈琴慶節 - 李八方

隔牆有耳:
深水埗明哥街頭彈琴慶節 - 李八方

人稱「明哥」嘅深水埗燒味飯店東主陳灼明,噚日獲邀參加一個藝術活動,喺深水埗街頭演奏《月亮代表我的心》,吸引街坊觀賞,佢仲大派200個燈籠慶中秋!
明哥話自己第一次彈琴,所以全程只係彈咗3個音;讀緊醫科嘅大學生Thomas就幫佢彈晒成首歌。適逢中秋,明哥喺活動後即刻趕返飯店,整咗300幾個素食飯盒畀深水埗長者同露宿者。

驚勾結外國 搵本地薑捐錢

明哥同八方講,上星期約咗美國駐港總領事夏千福見面,好親民嘅千福BB仲陪佢去天橋底派飯畀露宿者添!佢話𠵱家計劃喺元朗開間服務南亞裔難民嘅飯堂,只係做外賣、素食,打算請千福BB游說美國財團捐1、2百萬幫手營運,新飯堂目前向社會福利署申請緊戶口,最快下年先開舖。
除咗元朗,明哥亦諗緊喺觀塘同黃大仙開飯堂,義助本地基層,呢筆錢佢就打算搵番本地財團捐喇。點解要搵本地薑?原來明哥驚俾人鬧:「外國錢幫番外國人,香港人錢就要幫番香港人,唔係就會俾人話勾結外國勢力㗎喇!」

明哥仲獲千福BB送咗個紀念品。