女騎師蔣嘉琦本月19號夥拍蘇偉賢馬房嘅「有意思」大漏閘，令呢匹大熱門慘敗，賽後研訊冇得回水，成為馬迷嘅話題，當然有人彈嘉琦BB嘅表現，但亦有唔少網民撐嘉琦，認為佢經驗尚淺，慢閘可能係隻馬嘅問題，唔應該對一位小妹妹要求太苛刻，畀太大壓力佢。
其實嘉琦始終係女仔，手力或者差少少，騎一啲太大隻嘅馬未必合適，逼唔到啲大嚿飯迅速起步一啲都唔奇，開鑼日亦喺嘉琦胯下慢閘嘅「尊皇速龍」，體重正正超過1200磅，而「有意思」都接近1180磅，所以現階段嘉琦嘅擁躉，應該期望佢騎一啲較細粒嘅馬開齋。
睇番周一（28日）沙田賽事，嘉琦座騎中，「天狼星」唔夠千一磅，嘉琦應該應付得來，呢匹馬有唔少有利之處，今季已經熱身兩場，上仗得第五只輸個零馬位，狀態有保證，本身靠放易騎，孭最輕嘅103磅，排個2檔，而且田草1600米五戰三亞一季上名率達八成，基本上冇乜負面因素，可以話得黃金機會。嘉琦，畀心機呀！