唔使問，呢個禮拜碟場一定係俾《復仇者聯盟2》橫掃。電影票房位列史上第四，靠嘅係人多勢眾粒粒天王巨星。龍叔叔仲記得喺香港上畫時，各大院線聯手加價，4Dx版兩張飛要近六嚿水，就算退而求其次，用四嚿水睇IMAX版，訂飛都訂到兩個禮拜之後，難怪四日就摸住五千萬票房。戲迷甘心被劏，除咗超級英雄夠多夠勁，片長成兩粒幾鐘，自細無暈船浪暈車浪嘅龍叔叔，睇3D版到尾聲都開始頂唔順，好彩無睇4Dx版咋，唔係實俾佢搖到嘔住離場。
六個核心英雄，再加三個新人物，仲有單眼佬串吓場，成十個人，諗都諗到劇情有幾鬆散。咁多重要人物要鋪排，都唔知係咪得罪咗編劇，導演Joseph Hill Whedon都知大鑊，索性用高速手法交代劇情，呢邊廂萬人迷黑寡婦，居然愛上變形俠醫隻手仔，嗰邊廂Tony一手創造滅世大魔頭，再加上各自嘅心魔鋪排，十個人十件事，消化力弱啲都唔掂，劇情緊湊到爆，喺戲院睇真係人有三急都唔敢行開，好彩龍叔叔係坐喺屋企睇碟。
劇情預咗合家歡，表面係聯盟但經常內訌，最後同心合力降魔伏妖，地球嘅和平就靠晒佢哋。值得注意，今集大魔頭Ultron，係由Iron Man Tony Stark無意間創造出嚟，形容佢無敵到暈，搞到復仇者焦頭爛額。喺漫畫原作入面，其實係蟻俠嘅失誤，不過《復仇者聯盟2》早拍過《蟻俠》，所以電影版由鬍鬚佬食咗呢隻幾乎滅絕人類嘅死貓。
新人物Quick Sliver同Scarlet，一個無影腿一個識幻像魔法，勁似《X-men》嘅變種人。原來喺漫畫原著入面，真係磁力王嘅一對仔女，不過受版權所限，變成被另一幫壞人九頭蛇啟發出異能。講開版權，龍叔叔勁鍾意嘅蜘蛛俠就回歸Marvel，重拍電影版喇。
今集多咗合體技
打，仍然係最大賣點，今集打勻南非、韓國同歐洲，班復仇者去邊都所向無敵，不停救災救人，完全唔會有地位超然嘅元首走出嚟，嘈嘈閉話要去殖民化。今次喺節奏加快推進下，打戲都相當急進，睇到有啲眼花，不過新加咗美國隊長同雷神嘅「盾鎚合體技」又幾過癮。專門整治綠色巨人嘅HulkBuster亦係戲中亮點，兩件龐然大物喺鬧市大打出手，四處遭受破壞嘅視覺效果，睇到人好興奮。
洲立今次推出幾個藍光版本，2D、3D、鐵盒版都有齊。龍叔叔收到嘅係3D單碟版，一入碟已經要投訴，界面簡簡單單，只得播片、片段同設定三大選項，居然「一滴」bonus同花絮都無？見支援DTS-HD MA 7.1，先順番條氣，影碟內嘅音效真係做得唔錯，經常一大班人飛嚟飛去打鑊甘，音效定位到爆炸聲都清晰無「拆聲」。不過建議今次音量稍微收斂一下，因為兩粒幾鐘幾乎未停過打鬥，下下大大聲，耳仔都幾受罪。
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
編輯：李寶筠
美術：孔文彬