上周六由鹿島鹿角（右）對浦和紅鑽（左）嘅日聯重頭大戰，門將表現成為比賽嘅分野。鹿角門將曾端準送大禮令球隊落後，相反紅鑽門將西川周作（下圖）就喺最後階段屢救險球，幫球隊以2:1贏波，全取三分。鹿角喺開賽三分鐘就憑住遠藤康嘅入球領先，不過好快就俾紅鑽嘅高木俊幸迅速追和。雙方之後互有攻守，但去到下半場72分鐘，鹿角門將曾端準竟然接應角球甩手，畀對方嘅興梠慎三射入佢今季嘅第10球。之後鹿角大舉反擊，不過紅鑽嘅西川周作上晒身，連救多個必入波，令鹿角全場射足27次都無功而還。最後紅鑽贏波，排喺次階段第三位。
至於次階段聯賽暫時領先嘅廣島三箭，憑住淺野拓磨梅開二度，作客5:1大勝清水心跳，繼續領先。而下星期二將會作客廣州打亞冠盃四強嘅大阪飛腳主場以3:1贏咗柏雷素爾。