傳統上，足球比賽喺半場休息時間都冇乜特別活動，通常啲後備球員出場踢幾腳，球迷就爭取時間買嘢食同去廁所，但有啲班主就想搞搞新意思，希望透過自己嘅網絡，令半場休息都有聲有色。
上周五場英冠，富咸靠穆沙迪比利同柏寧高各入一球，加埋羅斯麥哥馬克梅開二度，以4:0主場大炒昆士柏流浪。喺中場休息嗰陣，富咸嘅美國班主卡漢就搵咗班靚女啦啦隊表演，唔好睇少佢哋，佢哋係NFL球隊傑克遜維爾美洲虎嘅啦啦隊，絕對係啦啦隊中嘅精英！點解卡漢無啦啦會班到隊啦啦隊返嚟？原來卡漢好鍾意體育，佢除咗係富咸班主外，仲係傑克遜維爾美洲虎嘅老闆！其實半場搵人勁歌熱舞，以前本地波都有，好似上季港超聯，YFC澳滌喺娛樂公司支持下，試過搵啲少男少女舞蹈員喺中場時間跳舞！