大家總有幾個麻甩佬約踢波嘅群組，但想約腳成功又唔會咁易無疾而終的話，就要學網上熱傳嘅WhatsApp群組心得一樣，集齊以下嘅各款成員！
1 領導人：要有一個長期服務嘅admin。會隨口約踢波嘅好多，夠膽開group嘅先係有承擔嘅真男人！
2 萬人迷：要有幾個風姿不減當年嘅萬人迷。最好波嗰幾個話去通常都會吸引到多啲人去，但通常都以為好波嘅係自己。
3 妄想狂：要有幾名不甘老去嘅世俗憤青。唔少中年漢不嬲覺得自己天生異稟，但硬係未發揮到出嚟箒，所以總係好熱情參與。
4 「弗」佬：要有幾個keep「弗」專家。就係唔知點解一把年紀都仍然童顏兼fit到暈嘅猛男，鍾意周不時send吓啲收身小貼士同勵志小金句。
5 臥底：要有掌握各種小道消息嘅「內部」人士。包括識人買場、黐場嘅靈通人士，以及同對手起底嘅臥底。
6 鹹蟲：要有幾個講黃色笑話嘅奇才。唔使奇才，因為其實個個麻甩都係。
7 早更：要有幾個經常值夜班同比公雞起得還早嘅失眠者。主要職責就係負責晨早上網book場，同埋morning call各位起身出發踢早餐波。
8 廢中青：要有一位甘願經常俾人欺凌嘅對象。未必係最屎波嗰個，而係一碼打飛機嗰位，雖然通常係同一個人。
9 虛擬玩家：要有一位經常身在海外，心繫本群組嘅時差小子。就係永遠唔會出現，但永遠話好想嚟嗰個虛擬朋友。
10 食家：仲要有群眾飯醉領袖。佢最關心其實唔係踢波，而係踢完之後去邊間食飯隊啤同吹水。
11 好隊友：最後要有幾個一言不發，寧願潛水浸死亦唔退出群組嘅基礎組員。佢哋永遠唔會提議任何嘢，但永遠第一個支持任何動議，呢款隊友先最抵錫。
KEYMAN
節目主持
電郵：mailto:[email protected]