梁政珏預產期是今年11月初，如今已經順利過渡八個月，真是可喜可賀。梁政珏首次懷孕就一波三折，兩度出血入院，經歷胎盤前置、胎盤過低和子宮後屈等問題，所以一直要待在醫院小心護理。中秋佳節，梁政珏繼續要待在醫院待產，不過她心情似乎不俗，前日她在Ig寫道：「今日我竟然有得散心，成個月以來第一次外出，雖然都係醫院去醫院，但已經好好好開心喇，仲食咗碗雲吞麵㖭，總算平安度過……」之後她又上載跟老公抱抱的照片，撫摸肚子的梁政𤤴一臉滿足。
「瞓喺度血凝固」
長期住院的梁政珏接受電話訪問時，解釋為何可以外出食雲吞麵的原因，她說：「因為我呢個情況，常見係會見紅，要流出嚟就會流出嚟，就算你倒吊個人，佢要流出嚟都係會流，但如果你瞓喺度唔郁，佢就會凝固，咁樣係好危險。」
「醫生建議企同行」
有指孕婦有出血迹象，便要卧床，忌四圍走動，梁政珏說：「老人家同坊間流傳都係話，如果見紅，就最好卧床，千祈唔好郁，唔好企起身，連洗手間都唔好去咁樣。我都試過卧床，就係因為聽老人家講嘅，醫生聽到之後就嗌我千祈唔好呀，有生命危險。so far我問過8個senior專業醫生，個個都話我呢個case一定企同行，如果唔係就好危險。但因為我哋都唔知邊一次見紅係生嗰次，所以為咗母子平安，就要喺醫院住，喺有需要嘅時候得應該要嘅照顧。」提到一個月後出世的兒子，梁政珏小心翼翼地說：「有時反覆啲有時就好穩定，一讚佢一兩句，跟住佢就會好小器……我個仔係最小器嘅。」
採訪：卓寶花
