噚日係新聞界一年一度嘅國慶酒會，CY同教育局局長「唔得掂」等高官都畀面出席。CY主禮後極速離開，無他，在場人士完全無視台上嘅佢，喺台下大聲講大聲笑，搞到侍應要拎個「儀式進行中，請保持安靜」告示牌四圍走（圖），叫嘉賓細聲啲。不過似乎唔多有效，除咗唱國歌時靜一靜，成棚人由開場嘈到完場，聲浪差啲蓋過埋現場播放歌頌祖國嘅紅歌，難怪CY嬲嬲豬，行家想叫佢停低回應李國能講司法獨立嘅事都冇機會。話就話新聞界國慶酒會，不過記者行家都係困住晒喺記者區，想睇真啲個台都唔得。唱國歌環節司儀叫全場起身，但係台下嘉賓根本無凳坐，真係得啖笑。