成班中大校友坐埋食午飯，傾傾吓政治經濟之時，中貿林突然之間話要搞一個校友關注組。關注啲乜？好似香港大學咁，分兩派校友各自關注校政，一派挺陳文敏，一派挺校委會，令相交40年，同是1973年畢業嘅程翔、彭泓基割席，互不瞅睬？呢啲事，提起都冇癮，程彭兩人與左丁山相識多年，程翔乃熱血傾左愛國分子，畢業後長期在左報服務，領取低薪而無悔，住簡陋村屋，搞到要在內地被國家收監，令人不勝唏噓，不知愛國何價，反而啲突然愛國派就成為人民大會堂常客。彭泓基係醒目商界搵銀人士，早年恐共移民加拿大，回流後大展鴻圖，在內地營商，搵夠後在中山住在華麗別墅，退隱山林研究玄學，突然間出山力挺校委會，與程翔筆戰，倒教人耳目一新。
問中貿林係唔係想搞分裂，佢話唔係，只係想搞一個「中文大學排名關注組」啫，因為近年中文大學排名不斷下滑，早已追唔上港大，又俾科大爬晒頭，依家連城大都大躍進，緊跟中大，容乜易明年就過頭，令城大成為香港嘅CUHK，而唔係中文大學㗎？
飯局校友聽到，幾乎低頭無語，但中貿林又話自己唔熟行，叫其他校友出頭，自己在後面支持喎。大學排名呢樣嘢，素來係商學院MBA最注重，因為大銀行及跨國公司請MBA做trainee或associate，幾注重排名，因申請職位之人太多，大公司嘅HR費事花時間慢慢見，只係搵吓前三四十名（最好係前十幾二十名）嘅大學畢業生嚟面試就算，故此中大商學院校友特別睇重FT嘅MBA排名榜，會向商學院院長反映意見，但整體大學排名咯喎，中大學生會好似要求過校長沈祖堯不要太注重，沈校長亦公開講過不大注重排名，於是咪係咁囉，中貿林之話要搞校友關注組，會令校長難做㗎。
QS之大學排名，唔敢話佢唔啱，但亦唔會啱得晒，問肥仔K搵印度理工學院（Indian Institute of Technology）嘅排名，佢搵到係第179，實際上IIT係科技名校，其校友雄踞美國矽谷IT公司高位，譬如Google行政總裁Pichai、Sun Microsystems創辦人之一Khosla、沃達豐前副總裁Sarin、Cisco嘅科技總監Warrior、麥肯錫前總裁Gupta，現印度儲備銀行（央行）行長Rajan，可謂世界級人才輩出，遠勝科大港大中大，但排名就幾低吓，閱讀大學排名，還要靠吓常識。