美國總統奧巴馬宴請國家主席習近平，不忘慶祝中秋節品嚐南瓜月餅；美國駐港總領事夏千福都入鄉隨俗，自己落手落腳籌備慶中秋活動，包括自己買燈籠佈置、派月餅畀有需要人士、學紮火龍，難怪網民留言狂畀like，話佢比CY仲似特首！
夏千福噚日喺fb貼相，佢話為咗迎接中秋，好高興可以參與中秋傳統習俗活動，好似佢為咗佈置領事館，專登去買燈籠，仲要好識貨咁話，一定要揀傳統手作燈籠！之後佢又去學紮火龍，又同深水埗明哥及一班本地學生向有需要人士派月餅，夏千福話係一大樂事，並祝港人中秋節快樂。
八方睇見夏千福真係玩得好happy，成班網民畀like佢之餘，難免又借夏千福向地位超然嘅CY寸兩句。有網民話好欣賞千福BB平易近人嘅形象，唔似得某啲國家領導人表面慈祥，內裏陰險！有人又話夏千福做好事唔使事先張揚，反而做咗先至公佈，身體力行才是做大事嘅人，明顯暗寸CY。
網民借千福寸CY
仲有網民誇到話，如果夏千福係香港特首就好，仲提議佢下屆參選！當然呢啲講法係冇乜可能，但亦可睇到，夏千福公關策略幾咁掂，佢嚟咗咁多年，人氣有升冇跌，香港特首、高官同議員真係要學吓嘢。
李八方
mailto:[email protected]