中秋舞火龍，百年歷史，要數大坑和南區的薄扶林村最聞名，但今年正月十五，遠在粉嶺坪輋的坪洋新村，竟也火龍舞動。「一早想將呢樣傳統帶嚟新界東北」。在薄扶林村出世的黃志強，自小離家，年紀大了，童年生活，反而特別懷念，坪輋是太太林月歡的出生地，兩口子相約退休後要在這裏落地生根。信守承諾，他笑說就連童年回憶，也一併搬了過來。
「我哋好夾，大家都愛鄉村生活，上年中秋佢入院，今年終可玩番晚，舞火龍，都係希望消災解難」。64歲的強哥說。甫入村，在村口已見纏上七彩燈泡的火龍，「村口嗰條，係我喺坪輋紮嘅第一條龍，因為喺室外日曬雨淋，所以用鹹水草紮，龍骨就以鋁架代替，放得耐都唔怕」。當年廢寢忘餐的絕活，一擱30年，卻在坪輋重生，「我話識紮火龍，連我老婆都唔信」。
追隨火龍舞動疾走，穿梭巷弄，少年時代的快樂回憶，以為忘了，原來早埋在心底。「我八兄弟姊妹，哥哥同細路妹負責讀書，我就負責玩」。當年的他，一早輟學，跟師父學紮龍，權充「龍友」高舉火龍遊村，不同角色，他都是中堅，「最傳統嘅火龍，要廿幾個壯丁先舞得動，巡遊至瀑布灣，會將火龍投進海，𠵱家時代唔同，多數燒咗就算」。
南區習俗「北傳」
「圍住條村，全部都係高樓，我哋仲有間祖屋喺度。呢度，先係我真正屋企」。結婚30年，妻子的家，成了他的家，「拍拖時跟佢返坪輋，講過一定要同佢返嚟生活」。江湖打滾，當年車房仔，變了今日校車司機，依然沒有發達，但他沒忘那些年的承諾。「喺度過啲平靜嘅鄉村生活，將舞火龍帶嚟坪輋，等佢都可以感受吓當年薄扶林村嘅氣氛」。
今年強哥與坪輋保衞家園聯盟合作，在坪洋新村首辦中秋舞火龍活動，本月初又開班，教村民紮火龍。「四圍都係竹樹，一早削定啲竹，浸咗水易扭啲，無咁易斷；反而禾草就好難搵，以前薄扶林村有牛奶公司，養好多牛，牛要食草，𠵱家連山貨舖都少，要去到元朗先搵到」。一條火龍，連繫着兩個地方，強哥說再辛苦都值得。
記者呂麗嬋