大師係點煉成？睇吓「呂壽琨傳奇四十年」畫展，或會領略到，點解一個1949年油麻地小輪稽查員，可以畫畫叻到1971年攞MBE，而畫作六十年代已開始喺英國唔同美術館展覽，目前倫敦維多利亞及艾伯特博物館、牛津大學都收藏佢作品。
八方前日喺展覽同大師女兒呂展露Helen傾偈，71年中大畢業嘅佢，已移居溫哥華，佢謙稱唔一定好多人識呂壽琨，佢話父親不論畫畫、做朋友、當父親，都近乎完美。可惜大師56歲辭世，20多年藝術生命，短暫但燦爛。
呂壽琨1948年由內地來港，做小輪稽查員維生，閒來畫畫寫作，後來喺中大教畫。Helen話父親格言係：誠則成，有誠意就會成功。畫展展出大師25幅作品，包括抽象禪畫、香港風景及書法，亦有佢當年小畫冊上嘅速寫真迹、原稿紙上嘅教畫筆記等，今日起喺藝術中心包氏畫廊展期至9月30日，之後喺藝倡畫廊展出至10月28日。