人力主席袁彌明（圖）前日透過民主動力，向公民黨提議換選區，即係用自己退選，換取原計劃選海怡東嘅陳家洛改選海怡西，然後由袁彌明力撐嘅海怡關注組主席區元發出選海怡東，到時分戰海怡東西嘅區、陳，就可同當區建制派議員一對一對撼，但建議遭公民黨拒絕。
袁彌明噚日話對此感失望，又話陳居於大埔，唔明海怡居民需要，參選會「好大鑊」，其實袁彌明曾建議進行初選或抽籤決定兩個區嘅泛民參選人，但都被拒絕，佢批評公民黨「好霸道」同「錯估形勢」，指若然陳家洛最終得票比區元發少，「就真係要笑三聲」，話不排除稍後會約陳家洛再交流喎。