周三晚賽事充斥「衰波」，要數「衰波」之首，睇怕都非利物浦同紐卡素兩支英超球隊莫屬喇！利物浦喺英聯盃第三圈主場對住英乙球隊卡素爾，賽前主勝賠率熱到1.05倍竟然開唔到，最後利記苦戰120分鐘都只係同對方打成1:1，要憑住互射12碼驚險晉級；至於紐卡素仲衰，主場0:1輸畀英冠嘅錫周三，第三圈就要拜拜，唔怪得盛傳兩軍嘅教頭都就快烏紗不保喇！
紅軍艱辛淘汰乙組仔
利物浦開賽前已經連續五場不勝，領隊羅渣士都唔敢收起主力，羅拔圖法明奴、占士米拿打正選。佢哋雖然有丹尼艾格斯先開紀錄，但好快已經被對方一個乖巧嘅入滲，由D艾沙姆追成平手。紅軍之後圍住卡素爾嚟攻，全場更加有47次射門，但攻足120分鐘都無功而還，要互射12碼分勝負。呢個時候，紅軍今季新簽嘅門將阿當保丹成為球隊救星，先後撲出對方三個12碼，幫球隊以總比數4:3擊敗對手。
利物浦雖然順利晉級，但紅軍球迷好明顯唔滿意球隊表現，賽後晏菲路再一次噓聲四起。羅渣士就黑口黑面咁話：「對方表現得好有信心，而我哋都要一步步嚟，慢慢建立番信心。」利物浦下圈就要主場對般尼茅夫，都唔易鯁。
紐記主場不敵錫周三
另一邊廂，紐卡素主場對錫周三好似打到作客咁，毫無主場氣勢可言，最後仲畀錫周三嘅麥古根一腳踢出局。賽後領隊麥卡倫火都嚟埋：「我好失望，球隊值得受到批評。不過我哋一定要盡快搵到解決方法，喺星期六同車路士對戰時，球員要好似戰士咁戰鬥。」
睇番最新排名，利物浦同紐卡素分別排第一同第三名，不過唔係英超名次，而係下一位離隊領隊嘅大熱排名。根據外國博彩公司嘅下一位離隊領隊賠率，羅渣士喺賽後由原來嘅第二位，進佔成為2.25倍嘅大熱，麥卡倫就以5倍排第三，而新特蘭領隊艾禾卡特就以2.5倍排第二。羅渣士同麥卡倫不斷強調要畀時間隊波，不過睇嚟球會唔會畀太多時間佢哋呢！英傳媒指利記雖然唔會搵高路普頂替羅渣士，但已經有鎖定目標喎！
