特首梁振英噚日同太太唐青儀一齊出動，唔係拍拖行街，而係去咗「保良局西營盤護老院暨長者日間護理中心」，同一班「老朋友」提早過中秋。勞工及福利局局長張建宗都有同行。
佢哋除咗同近百名住宿院友分享月餅同生果，仲落手一齊製作應節燈籠；其間一名89歲嘅丘婆婆畀咗個難題CY，要CY估吓佢幾多歲？八方唔知CY有冇答中，但佢大讚丘婆婆同一班長者活力十足。
政府喺2001年引入競爭性投標以揀選安老院營辦者，CY今次到訪嘅院舍就係以呢種「合約院舍」模式營辦，提供資助同非資助宿位及日間護理照顧，其一特點係設喺市建局同發展商共同興建嘅私人屋苑內，CY話呢種模式值得推廣。