羅湖懲教所最近進駐一群被遺棄狗仔，佢哋唔係被監禁，而係一邊享受「洗剪吹」，一邊幫19位女性在囚人士完成寵物美容及店務助理課程。噚日一班學員終於畢業，經歷兩個月相處，人同狗都重獲新生，有狗仔被市民領養，26歲阿惠（化名）亦明白要用愛心同耐心去溝通，近期仲寄信畀屋企人修補關係。
34歲阿文（化名）致辭時話自己因為販毒入獄，屋企人話對佢好失望，唔會再探佢，連爸爸急病過身，阿文都唔能夠送最後一程，所以覺得好後悔，「除咗喊，咩都做唔到」。阿文後來報讀寵物美容課程，希望重獲屋企人同社會支持。懲教事務監督譚國強話，進駐懲教所嘅狗仔大多係被人遺棄，來自愛心狗場，今次課程好受歡迎，會考慮再開辦喎。