昨日講咗一位老人家廠商認為2017年特首選舉工程已經開始咗，政府明知今個立法年度（2015/2016）好難通過取消強積金對沖機制，而仍然放風話要在明年一月發佈嘅施政報告提出嚟，肯定係虛晃一招。
點解難在2015/2016立法年度通過呢？
施政報告一月宣讀，財政預算案二月宣讀，立法會自以財政預算案即時影響民生（如派糖），視之為優先，到時預料陳偉業、梁國雄、陳志全三位議員又會提出不同要求，打拉布，令預算案拖延一兩個月，到討論強積金對沖機制嘞，張宇人議員已經預警，如有取消之議，必定打拉布。大家拉得兩拉，必定阻住其他法案、議案，在七月散會之前立法會忙個不休，邊有時間去通過有關強積金議案吖。
既然如此，點解要提？原因有二，明年係選舉年，泛民及工會幫議員一定全力支持取消對沖機制，加上工聯會及民建聯選票，政府有啲機會偷雞過關，犧牲工商建制派在所不惜。第二，如果唔通過，梁振英可以在2017年特首選舉時話自己爭取過，因香港打工仔多過老闆好多，屆時鍾庭耀嘅民意調查可能對梁振英大大有利，反之，工商界支持嘅人選，未免扭扭擰擰，驚住失去民望。你知啦，阿爺上次支持梁振英嘅一個藉口，就係佢嘅鍾庭耀調查民望，高過唐英年吖嘛。可以拗嘅係，冇咗一人一票選特首，工商建制派可以在1200人選委會中砌死佢啩，但不可不知，到時視乎對手是誰，點知中央大員（如張德江）會唔會又試南下深圳，要建制派根據中央指示投票㗎！
老人家廠商話，明年多數唔會通過取消強積金對沖機制，但不論事件如何發展，為此事創造爭論，當權者在競選工程上有贏冇輸，最為得益。梁振英本來以為連任無懸念嘅，特別係選舉制度原地踏步由1200人選舉㖭，點都會有689票啩。但政改失敗之後，梁特以為一切盡在掌握之中，竟然要重組內閣，炒咗曾德成與鄧國威，咁就令到老愛國建制派及公務員好㷫，且不止此也，綜合金融界及商界消息，炒曾鄧之前，還有訊息顯示會同時炒埋曾蘇，故此曾經出現習握手一幕，加上驚住工聯會未嬲完，民建聯又會反枱，於是曾蘇先至得以留任。有此刺激，一啲本來已經叠埋心水嘅人物大可能會奮起，挑戰恨連任恨到發燒之人，明年八九月就有分曉嘞。