取消強積金對沖誓成下個政商界戰場，早前經民聯話要同幾大商會及自由黨等成立平台應戰，點知自由黨拒加入，原來佢哋會另起爐灶。該黨張宇人同八方講，此舉為免今日大聲話反對嘅議員，將來賣甩佢哋，由得自由黨同中小企孤身作戰。
張宇人質疑經民聯林健鋒貴為行會成員，點會向政府說不？佢又同呢班保皇黨翻舊賬，話當年政府提出搞最低工資時，呢班經民聯議員同大型商會起初反對，但最後得番佢一個頂住，見過鬼都怕黑，今次寧願由自由黨拉攏中小企打仗，話政府一旦開戰，佢哋即齊腳迎戰。張呢次為打仗都幾瞓身，近日仲應港台《頭條新聞》節目邀請，戴住廿蚊紙面具喺「頭條好聲音」唱《半斤八兩》。