九十年代三級片女星林雅詩（Grace），自從05年嫁給經營鋼鐵生意的老公後，退出娛樂圈專心相夫教子，不過息影多年後，突然復出拍寫真，於是令人聯想到她的婚姻出現問題。Grace前晚在旺角出席月餅收集活動，見到她左手手腕包了繃帶，神情略見呆滯，問她是否扭親？林雅詩有點避忌地說：「唔小心整親。」後來再三追問下，她想了一會才說：「自己唔小心整親，少少𠝹傷。」不過她受傷的位置有點敏感，難免令人聯想有自殘之嫌，但她說：「冇乜特別。」
傳婚姻亮紅燈
對於有傳林雅詩的婚姻疑亮紅燈，她說：「冇乜特別，都OK。近排會比較忙啲，10月會出寫真，有好多宣傳同活動要出席，加上我又要湊小朋友，囝囝就快10歲。」問寫真的尺度？Grace強調：「𠵱家做咗媽媽，一定唔會似以前咁大，我諗係健康嘅性感，呢排因為呢本寫真集都好大壓力，一嚟多嘢做咗，二嚟又發生咗啲嘢，令我真係有少少想後退，但係我係唔可以後退，所有嘢已經進行緊，搞到我有少少唔開心。」再問是甚麼事？她說：「係囝囝學校嘅事，其實佢已經轉咗校，我之前喺囝囝間學校做家教會委員，家教會知道我就嚟出寫真，有啲說話直情影響我聲譽，我又唔係做乜，寫真都未出，已有咁嘅說話，搞到我瞓唔到，好多時要食藥。」
說時林雅詩更一度哽咽，她續說：「我自問盡心盡力幫家教會，學校對我冇問題，點解佢哋都要咁對我？話我做啲嘢會影響佢哋家教會嘅形象，我噚晚已經搵同事發聲明畀家教會，因為呢件事對我而言太煩擾。」至於丈夫有否安慰？她說：「其實好多事佢都唔知，好多嘢唔會刻意講，而且都唔係開心事，我哋係一齊住，但係唔會刻意講工作嘅嘢，出寫真佢都唔知，見到先算。」
採訪：譚倩宜
攝影：陳慧安
