尚嘉控股行政總裁吳士元舊年底重出江湖，幫賭王四太打理地產投資，其實吳士元本人都坐擁唔少優質物業，最多人知道佢持有一個君臨天下單位，原來淺水灣老牌豪宅華景園，佢都有樓收租。
地產界新近有消息指，華景園1座一個高層A單位，實用面積2,482方呎，最近以月租10萬元租出，雖然呢個單位嘅業主透過海外公司買入，據聞業主就係吳士元。
吳士元以5,650萬元買入單位，今次順利租出，回報率雖然得2.12厘，但豪宅升值潛力厚，佢又一直鍾意買磚頭，相信都唔急賣。
佢2010年離開恒隆地產（101）後，都有喺二手市場買豪宅，好似2011年就用近半億元買入西貢柏濤灣洋房。持有咁多磚頭，佢復出打工應該只為興趣喇。