呂志和獎成立典禮上，出現一位比較特別嘅面孔，佢就係美國前國務卿賴斯（Condoleezza Rice）。呂志和邀請佢成為獎項理事會5位成員之一。
賴斯噚日着上一條簡約嘅黑裙，配襯珍珠頸鏈、鑽石耳環，睇落相當精神，同人講佢今年61歲真係冇乜人信。
佢談吐相當有風範，喺台上介紹自己時指，「我嘅真正身份，係大學教授」。佢2009年退出美國政壇後，喺史丹福大學商學研究院擔任Denning Professor，亦係胡佛研究院資深研究學人。
佢話，雖然承蒙大家稱讚佢喺政治舞台上嘅表現，佢最享受嘅，反而係參與到學生成長過程。佢仲寄語大家「唔好成日諗你失去乜嘢，應該珍惜自己擁有嘅嘢」。