呢輪英聯盃有場重頭大戰，就係阿仙奴作客熱刺嘅倫敦打吡，兩隊都係半力出擊，阿仙奴前線把握力麻麻地，好在防中法米尼上晒身咁，上半場靠「執雞」先入一粒。換邊後，雖然阿仙奴中堅哥林張伯斯擺烏龍，但法米尼喺78分鐘禁區頂窩利射個靚波，幫兵工廠鎖定贏2:1，阿仙奴下圈會對錫周三。
法米尼𡁻兩粒踢走熱刺
熱刺前鋒哈利卡尼呢場都幾冇運仔，先有吓自己衝出底線，個頭撼中廣告板，中咗「頭獎」，其次有球姿勢分滿分嘅窄位倒掛，點知又被人護空門，今季仲未開到齋。呢場波都好多花邊嘢，例如作客嘅阿仙奴球迷都幾冇品，將人哋熱刺主場嘅橫額（圖）拆鬼晒落嚟。如果下次熱刺球迷去到阿聯酋球場拆台、拆凳報復的話，阿仙奴就唔好怨人嘞。另外，冰球壇嘅名宿格斯基特登捧場，主人家熱刺好識做，賽前送咗件波衫畀人，但點知印錯人個名，將Gretzky印咗做Gretsky，擺晒烏龍。