【金鐘】陳慧琳（Kelly）與老公劉建浩（Alex）下周五結婚7周年紀念日，已成兩子之母的Kelly，不時要返內地工作，由老公Alex身兼母職，負責照顧分別六歲的「蝦餃仔」劉昇及三歲的「小龍包」劉琛。日前本報便發現Alex一拖二，帶兩子到金鐘與友人飯敍。
當日傍晚6時許，Alex駕駛七人車載蝦餃仔及小龍包抵達金鐘，同行還有一位男友人及一個小男孩，只見小龍包全程熟睡，相反哥哥蝦餃仔精力無窮，由落車一刻便跳跳紮。之後他們到了附近的餐廳食意粉，由於小龍包入到餐廳仍未睡醒，Alex惟有一直抱着他，上菜就把他放在座椅上繼續睡。蝦餃仔則整古作怪，見爸爸想夾意粉給他，便將成個碗放在頭頂當帽戴。而Alex飯後煙癮起，叫朋友幫忙照顧兩子，讓他到門外嘆飯後煙。
另外，年底要開紅館演唱會的Kelly，昨日到荃灣一間老人院派月餅，Kelly預計中秋節要排舞，之後才會跟家人慶祝。早前Kelly透露有意安排兩位囝囝登台，她說：「暫時排緊快歌部份，其他未排，所以未知佢哋係咪上台，可能要當日先知，但佢哋上台我都驚，跌落陷阱咪死。」
「啲仔好開心」
Kelly承認現在由老公主力照顧囝囝，她表示：「佢話搞得掂，佢同我教法唔同，佢free啲，啲仔好開心，隨時可以食零食。」有指蝦餃仔考男拔萃等名校「撻Q」，Kelly澄清說：「冇考過嗰間學校，我哋想佢去國際學校，所以冇考本地學校。」Kelly說最重要有沒有讀書，如果懶，讀名校都無用。
採訪、攝影：徐錦池、朱志聰、馬建華、陳慧安
