【本報訊】「我只係想每逢過節可以同佢食吓飯。」失散逾半世紀，岑雅麗六兄弟姊妹皆年過半百。原本有七兄弟姊妹的岑家，希望在中秋佳節之時，透過紅十字會尋人服務，尋回兒時被嫲嫲送往其他家庭收養、現時年約58歲的四妹岑慕顏。
記者：周詠雯
兒時家貧，一家八口住在石硤尾徙置區，家中只有一張床。排行第二的岑雅麗坦言：「當時個個鋪張蓆，瞓地下」。祖母惟有將出生約1個月的四妹送走，因「點都好過餓死」，「當時阿媽打開個米缸，望入去一粒米都冇」。大哥、二姊和三姊年幼便要打工，「希望四妹唔好怪我哋」，坐在旁邊的三姊岑露莉說。
四妹被帶走後，大哥、二姊和三姊亦曾於1961年與四妹在干諾道中展鵬餐廳門外見面，但當時眾人年紀不過十歲八歲，情景日漸模糊。「淨係記得阿嫲話呢個係潔儀、係你哋個妹，又叫岑慕顏。」從祖母口中得知四妹被姓張或姓李的人收養，但四妹養母知道她見過親兄姊後，就阻止他們來往。「淨係知佢叫潔儀，係呢個『儀』定嗰個『兒』定其他『怡』都唔知。」四妹當時樣子與比她年長一年的三姊十分近似，猶如孿生，「希望佢（岑慕顏）睇到我個樣，覺得似會相認」，三姊岑露莉說。
求助紅十字會
眾人在1980年代曾嘗試尋親，二舅母指四妹或人在澳門，岑家各人燃起希望，最終失望而回。「阿媽一聽到消息好有希望，落空之後就成個人耷晒。」三姊岑露莉憶述母親去世前數月仍不忘四妹，「佢成日喊，話自己其實生咗七個（子女）」。年屆88歲的父親早年不願多提四女的事，但近期亦已表明希望找回四女。
與四姊素未謀面的七弟岑衛強，得知紅十字會尋人服務曾成功助人尋親便決定求助。他坦言：「大家都好掛住佢，呢件事對媽媽嚟講係好大遺憾」。受三名兄姊供書教學，現為工料測量師的岑衛強指，「我比較識寫字，上天交咗個使命畀我搵家姐」。二姊岑雅麗希望尋回四妹後，縱然不能一同生活，亦可在大時大節一家吃頓飯，「我都知我哋個故事唔係啲咩感人嘅故事，但我哋真係好想搵番個妹。」
紅十字會尋人電話：2507 7135
