地球上跑得最快嘅男人係牙買加跑手保特，佢跑100米最快只係需要9秒58。咁年過100歲嘅老伯伯最快又要幾耐呢？答案係42秒22。現年105歲嘅日本老伯伯宮崎秀吉周三喺京都大師秋季運動會，以42秒22創下105至109歲嘅百米跑健力士紀錄。
42秒22入健力士
宮崎老伯伯喺創出百米跑世界紀錄後，亦好似啲田徑選手刷新紀錄咁，走到個計分牌前影威水相留念；而且仲相當鬼馬，扮晒保特咁做出對方嘅招牌動作。賽後佢仲話，好想同保特跑番場喎：「我好想同保特比賽，我一直為呢個夢想而努力生存落去。我好努力去保持自己嘅體形，生活得有規律同健康。查實我仲好後生箒，仲有進步空間，應該可以跑多五年㖭！」宮崎老伯伯除咗對腳厲害之外，對手亦一樣咁壯健，以3米25創下105至109歲嘅推鉛球健力士紀錄。