南華新亞援有着落？「少林寺」周二宣佈將澳洲前鋒寶馬炒魷，話咁快就物色咗東帝汶國腳Murilo de Almeida。球隊今晨喺南華會備戰周六對冠忠南區嘅港超第一擊，呢名26歲射手都會隨隊試腳。
東方同南華周六分途出戰傑志同南區，噚日兩支大軍咁啱同場喺京士柏操練。南華日前炒咗表現不濟嘅寶馬，操練嗰陣都未有新消息，但下晝就公佈搵到東帝汶國腳Murilo de Almeida，噚日仲已經到埗準備今晨試腳。呢位前鋒喺巴西出世，身高1米86，連埋U23，總共為東帝汶上陣11次入九球，亦曾經先後喺巴西、印尼搵食，今年初轉投日乙球隊大分三神，再被外借去日丙。至於佢上唔上到山同陳肇麒做前鋒拍檔，南華就話要觀察表現先，希望可以趕喺10月轉會窗關閉前完成組軍。另外，南華噚日仲話會搵嚟「擁南躉之歌」原唱者「大AL」張武孝，周六喺比賽當日吹號角撐場，希望催谷氣氛帶領球隊喺港超首仗贏波。
東方苦練角球迎傑志
至於東方周六喺旺角場主場，同傑志合演港超大戰，教練楊正光話球隊之前表現未如理想，噚日試咗唔少新戰術，包括苦練角球；隊內氣氛唔錯，中場羅拔圖收操後仲拎個爛波扮蜘蛛俠鬆一鬆。