除咗高登方丈辦紙媒，《都巿日報》亦搞咗本三合一娛樂雜誌，搞咁耐終於出世！呢本周刊叫《E週刊》，鐵定10月8日試刊，三刊主打娛樂、飲食、時事，逢周四出版。之前有消息話，老闆黃浩會起用《忽周》往日班底搞《E週刊》，但原來佢唔只搵《忽周》嘅人，仲搵咗《蘋果》前高層加盟。
八方聽聞黃浩禮聘《蘋果》前執行總編輯蕭煒春（Terry）出山，幫佢搞時事新聞。
Terry當年喺《蘋果》除咗負責睇住採訪部，後來又被肥佬黎委以重任去搞動新聞，雖然後來以家庭為重離開《蘋果》，但就繼續幫《蘋果》寫親子專欄，都有好多讀者㗎！今次佢重出江湖，八方梗要問佢兩句，但佢就唔回應喇！