票房不好、交通擠塞、腸胃不適，都是土地問題，情況如「地硬」雷同。梁國斌執導的電影《死開啲啦》開宗名義借吸血殭屍來探討這個死結，對號入座揶揄無良地產商。現實中三位戲中演員林德信、雷琛瑜及河國榮都是屬於無殼一族，他們不約而同都面對買樓問題，有父蔭加持的Alex亦試過逼遷滋味，「遷拆戶」正是父親林子祥。
撰文：卓寶花
林子祥（阿Lam）囝囝林德信（Alex）、雷琛瑜（J.Arie）及河國榮早前為電影《死開啲啦》宣傳接受本報訪問，土地問題、地產霸權為人詬病，樓價上漲同時衍生出民生問題。由林家棟監製、新晉導演梁國斌執導的《死》片，借Alex演的殭屍被地產商起樓吵醒，迫不得以跟J.Arie及鬼佬租客河國榮生活在同一屋簷下，面對無良地產商收樓逼遷，道盡港人生活困擾。
買樓成壓力
現實生活中三位藝人均沒有自己物業，都是以租屋為生。上車成為不少港人一生奮鬥目標，變成結婚難，上車更難上加難。Alex對「買樓」兩字頗敏感：「一年前我冇呢個諗法，但近半年有諗，我覺得開始受到香港影響，𠵱家覺得係一種壓力。好多女仔計劃25歲要結婚，之後買樓，30歲要生仔，我覺得唔需要。」
Alex在父蔭下入行，原來他曾被父親林子祥逼遷，他笑說：「由細到大屋企人冇同我商量過居住問題，亦唔會畀首期我，六年前我返港打算長住，當時仲未入行，我問老竇可唔可以同佢一齊住，佢話OK。點知住咗大約四個月左右，有一日我瞓醒，老竇就話我要搬走，因為嗰個月沙麗（葉蒨文）嘅爸爸媽媽喺加拿大想搬返嚟，我一定要讓番間房出嚟，於是就即刻搬，同妹妹一齊租咗個兩房單位，靠夾band為生交租。」
Alex由小到大玩音樂都有一個「預咗窮」理念，將錢看輕減少自己壓力，他說：「以前美國生活會揸車，儲定一堆散紙，去油站入油就話要入咁多，睇餸食飯。細個睇好多創作人點生活，話你係準備唔會有錢，可能我信咗呢個理念要窮，所以我慣咗，覺得無論你幾辛苦冇錢，係唔會死，一定有方法生存。」總之一講到買樓，Alex就話免問。
J.Arie願捱老麥
而在戲中演港女的J.Arie強調自身一點都不港女，不一定有樓才嫁，還可以和另一半捱老麥。相對J.Arie生於小康之家，可說是幸福新生代，生活和買樓對她未構成壓力，她說：「好似Alex講係大勢所趨，近月有留意樓價，覺得後生一代冇上一代幫忙買樓好吃力，我爸爸媽媽提議幫我畀首期，我話唔好，畀我試用自己雙手去搵錢先，想試吓靠自己先。」
