醫院管理局噚日公佈人事調動，靚女行政總監鄭信恩會由大埔那打素及大埔醫院，調到律敦治及鄧肇堅醫院和東華東院，接替退休嘅林達賢。鄭靚女喺大埔多年，要同鄉親父老打交道，醫管局喺新聞稿讚佢成功同社區唔同持份者建立夥伴關係，優化地區醫療服務。北區醫院行政總監文志賢會兼任鄭靚女個位。
有醫管局之花之稱嘅鄭信恩開始為人熟悉係03年沙士，當時佢孖住時任衞生署署長陳馮富珍日日做430記者會，一出場就令人眼前一亮，從容面對鏡頭，自此獲高層器重。鄭靚女一直喺醫管局總部做嘢，09年升任大埔那打素醫院及大埔醫院行政總監，相信今次調任後可更上一層樓。接任鄭信恩個位嘅文志賢係新界原居民，要擴大同鄉紳打交道嘅網絡相信難唔到佢。