導演劉偉強前晚在鰂魚涌為一個設計師展覽擔任講者。美國華納兄弟宣佈跟華人文化產業投資基金（CMC）合資在港成立總公司，被問到會否跟華納合作？劉偉強故作神秘說：「唔講得住，到時會公佈，啱啱簽署，點樣都好，都係好嘅。」他續說：「如果以香港電影人嚟講當然係好消息，或多或少都會請多咗香港人，𠵱家大部份電影都係合拍片，多數返內地拍，總部設喺香港，我天真咁諗會起片場，可能多咗喺香港拍，增加就業。𠵱家少咗港產片喺香港拍，變咗有啲位青黃不接，好似燈光、場務、收音。」他完成《賭城風雲3》後，會着手搞《頭文字D2》，明年亦有另一部電影計劃，稍後會再公佈。
採訪、攝影：馬建華