經過頭幾輪英超，唔少球隊都畀到球迷驚喜，例如李斯特城；但亦有啲球隊令人大跌眼鏡，好似「東北雙雄」新特蘭同紐卡素，已經變咗「東北雙熊」，齊齊排喺榜尾，越踢越沉，見唔到咩希望。
新特蘭同紐卡素仲有個共通點，就係夏天使咗唔少錢，買咗幾個新兵，但班新球員仲未做到嘢。小弟就講多啲紐卡素，紐記牌面唔差，但今季踢落最大問題係進攻，佢哋踢咗六場聯賽得50次射門，係今季英超最少射門嘅球隊，數字連曼城、阿仙奴嘅一半都冇；而中目標射門都係全英超最少，平均每場考驗到對手門將兩次多啲。
紐記變咗「不射隊」，前鋒當然要孭鑊，今季千幾萬鎊買番嚟嘅塞爾維亞中鋒阿歷山大米祖域雖然係《FM》妖人，又入圍過金童獎候選名單，但嚟到英超淨係識攞牌，踢幾場就拎張紅牌唞吓。唔計米祖域停賽令柏比斯施斯重回正選，紐記前場又真係唔太穩定，三個進攻中場成日唔同人，季初就用奧巴坦，間中用吓艾約斯佩雷斯，呢排就多用泰奧雲。可能因為中前場成日變，韋拿杜姆、泰奧雲都仲未融入到球隊，施斯狀態亦唔好；講真，真馬特有時喺右閘位殺上嚟助攻仲可靠。
今季紐記幾似上季，季初幾場踢到屎一樣，但喺「神帥」柏度帶領下，隊波10月開始上晒身咁，靠一陣連勝彈咗上上游，靠嗰排嘅成績，紐記先護到級。今季冇咗柏度，真係唔知麥卡倫夠唔夠料帶返隊波上嚟！
文：咖喱