阿仙奴上周六輸咗畀車路士，中場高基連傷埋要唞一排，咁啱會方賽前公佈業績，上季賺咗2,500萬鎊，仲儲埋兩億鎊資金冇使到；球迷將輸波矛頭指向迪亞高哥斯達之餘，仲發洩喺領隊雲格身上，又鬧佢今季慳家，白白浪費一個具爭標潛質嘅陣容。
不過咁，肯使錢都唔一定有好成績。「黑貓」新特蘭季季都使唔少錢擴軍，只要留得喺英超，多多錢都肯使；前線波連尼同謝明蘭斯都過千萬鎊身價㗎，加埋三季前又使千幾萬鎊從狼隊收購史提芬費查，唔打得都嚇得。不過，𠵱家入波最多嘅黑貓前鋒係免費由美職聯回流嘅迪科爾，真係一個大諷刺。
大台劇集成日俾人笑千篇一律，新特蘭呢幾年嘅「劇情」都好例牌──例牌開季戰績低迷、例牌炒領隊、例牌一月又買人救亡、例牌新領隊又創奇蹟。上季黑貓原本都九死一生，點知臨尾連贏愛華頓、修咸頓，又喺阿仙奴身上搶分，結果成功上岸，球迷就當荷蘭領隊艾禾卡特神咁拜；不過，今季用4,000幾萬鎊擴軍，黑貓就踢唔番上季尾嗰份鬥志。其實睇新特蘭啲波都係種折磨，中前場各自為戰，冇咩交流同組織，後防就派膠多過食飯；好彩英格蘭東北部真係幾少娛樂，佢同紐卡素之流，球場都經常坐到滿，但死忠球迷總有心淡一刻。
睇番黑貓賽程，嚟緊對曼聯、韋斯咸兩支前列分子，三分唔使點望；如果之後對西布朗都開唔到齋，10月25日東北打吡對紐卡素，就睇吓邊隊反底。
文：牽牛