今明兩年有區議會同立法會選舉，泛民政黨冇北方「大水喉」射住，要應付龐大選舉開支，總要諗計開源。民主黨司庫袁海文就同八方講，諗住區議會選舉後，搞個月捐計劃，所有地區兄弟一齊「跑數」，搵支持者每月捐款，以目前約100個黨友喺地區服務，每人每月搵到人捐1000蚊，個黨都多10萬蚊，可以用番嚟做地區服務同研究。佢話月捐嘅好處，可以令民主黨有相對穩定收入，該黨過去主要靠黨慶籌款同一年一度賣獎券，但好似上年因為佔中，黨慶都要改期，又例如2010年政改之後，受社會政治氣氛影響，民主黨賣獎券嘅收入都大減㗎。