八方噚日行過銅鑼灣希慎廣場一樓中庭，發現噚日起至9月27日舉行「#MYSPARKHK」展覽，主辦單位星展銀行特別邀請咗英國字體創作藝術大師Sean Freeman，為活動特別打造七彩奪目嘅巨型26個英文字母，畀大家自行拼砌有意義嘅文字。
蘭桂坊之父盛智文及民主黨主席劉慧卿等政商界名人噚日都有響應砌字，盛智文話香港為佢帶嚟無盡歡樂回憶，所以砌出"LOVEHK"表達愛意。卿姐就好關注香港嘅外籍傭工，以"DOMESTIC WORKERS"提倡改善外傭聘用制度。市民只要將拼砌嘅文字設計上載到facebook或instagram並標籤「#MYSPARKHK」，星展就會捐出港幣10蚊畀「願望成真基金」，為患有嚴重疾病嘅兒童實現願望。