近期港股麻麻地，難得有隻香艷嘅內衣新股維珍妮國際（2199）搞上市，真係唔買都要睇吓。
維珍妮噚日喺中環四季酒店舉行投資者推介會，請咗6女2男模特兒行花生騷。6位身高6呎嘅美女，伴隨住節奏澎湃嘅音樂，輪流行咗十幾轉，每次穿上不同顏色與款色嘅bra，最後由兩位着上緊身衣嘅大隻男模作結。
投資者推介會通常都係邀請基金經理參加，現場見到有七成都係男性。
完場之後，每人獲贈紀念品，女裝有桃紅色bra（碼數清一色係B75），男裝有緊身褲加件運動polo恤，任擇其一。
其實本港早有內衣股，包括黛麗斯（333）與都市麗人（2298）。維珍妮主席洪游奕賣花讚花香，指管理層對胸圍與貼身內衣業有熱誠，並且富有激情，似要有一番作為咁話。