42歲的葉蘊儀，由《孔雀王子》的阿修羅，到《女人俱樂部》的肥菜，再成為碩士、出書，過去一年更不時登上港聞版，支持雨傘運動、撐電車，追求社會公義，成為有態度、肯發聲的女藝人，「我唔鍾意人叫我公義女神！烈女同中女俾我揀，我寧願揀中女，因為中女可以有無限可能。」中女葉蘊儀，派給自己的未來任務，除了繼續關心社會、搞藝術，還有五年後讀哲學博士，和找尋人生另一個伴侶，從無限可能中，進化成中女2.0、3.0。
撰文：林妙萍
造型：陳蔚渝
攝影：周樂恒
化妝：諺瞳．小白
髮型：Maggie fannie of La Biosthetique
上《100毛》變身80年代和風少女、上《主場新聞》傾民生政策，葉蘊儀玩得又肯講，是用心做事的女人。雨傘運動快一周年，記得她去年默默在夜深街頭繫黃絲帶支持學生，過去一年，facebook上對本地、到世界的不公事，一樣敢於表態。
「做藝術要有態度」
「我唔鍾意人哋叫我公義女神！我冇留意呢啲嘢，自己都係照直講啫。」她解釋並不是要擔旗擔槍，衝在最前方，只是我口說我心，拒絕吞下不公不義，「可能我冇當自己係藝人嘅身份嚟發聲啦，冇諗咁多。自己係從事藝術創作，藝術創作就係要表現你對社會、你對周圍事物嘅觸覺、感受，所以更加會care，更加會出聲。對一啲我覺得唔妥、唔啱嘅事，就會講出嚟，就算我唔用說話去講，都會喺作品上去演繹我嘅意見，做藝術係要有態度。」被問得太多次why？ why？why？她索性在facebook一次過貼相回應。無形之手或壓力一定存在，何韻詩連申請紅館也受阻，最現實考慮是影響返內地、搵人仔，「我好鍾意香港喎！又唔係好大嘅擔心，我仲有其他工作。」
愛之深、責之切，香港民生政策出現眾多問題，用十四、十五年儲首期買樓的荒謬事無處不在，「住屋係人嘅必需，唔應該係奢侈品，政府應該為市民負責任。每個香港人、或者一個家庭都應該分配到一間公屋，呢個係基本，有瓦遮頭係好基本，唔使捱租，成世只為咗一層樓！」
揀另一半怕黐身
葉蘊儀22歲突然放下一切，閃婚生了一對仔女，27歲和前夫陳柏浩離婚，講愛情，「𠵱家冇拍拖，冇時間，搵一個伴將來係會要嘅，但唔係𠵱家呢個moment。𠵱家搵，要諗埋啲細路鍾唔鍾意，又要迎合埋佢哋，咁我唔係想搵一個夾到我細路嘅人㗎嘛，因為，我係要搵一個下半生同我一齊嘅人，唔係同我啲細路一齊。」男友要求？聽落老土但實際：懂得欣賞她，「冇乜要求！真係，樣貌、身形都係眼緣，唔一定要從事藝術創作，兩個人做藝術，邊個去搵錢呀，哈哈哈！咁講，應該話搞藝術嘅，大家都咁自我，好難相就。」對愛情仍然有幻想，「唔需要一啲表面嘅嘢，需要心靈上嘅溝通、欣賞，最緊要有大家嘅空間，可能我慣咗一個人，如果佢太黐身，可能我都頂唔順。」
再入校園讀博士
42歲，人生才行了一半。未來，葉蘊儀腦海還盤算着許多人生計劃，包括再走入校園讀博士。「之前讀咗好多年，想停一停，所以就去寫書。我鍾意有課題、有目的咁去做事，一個project 一個project咁去完成。」澳洲墨爾本皇家理工大學純藝術碩士畢業，下一回的時間暫定在四、五年後，仔女上大學時，再去諗讀哲學或文化研究考古學，「返學讀書好，自己睇嘅話，可能只睇一本書，但要交功課、寫論文，你會逼自己睇十五本書，咁你咪可以睇多好多，係一件好事。」
關於書，葉蘊儀出的書也是她人生寫照，少女期的日系美女寫真集、其後出的紙粘土、陶藝工具書。今年寫的第一本散文集《她們的二三事》，從二十三個中外女星，講述二十三種女性可貴可愛的特質，正反映她近年關心的女性議題，「封面嘅自拍相，概念係源自自己可以掌握自己，我以往都係女藝員，而書入面嘅文字係我寫、女星嘅畫都係自己畫，我想件事完全啲、完整啲。」至於自己未能擁有的特質，竟是和蔡瀾一樣：未能食素。
冇得揀選擇題
做人最怕冇得揀！今次和葉蘊儀做一個二揀一的選擇題，看看她冇得揀的揀法。
A：中女 B：烈女
答：中女啦，因為烈女會有一種既定嘅睇法，中女嘅範疇多啲，中女可以有無數嘅可能性。
A：洗腳水 B：肥菜
答：洗腳水啦，呢個係我第一個喺台灣嘅暱稱，當時國語唔好，人哋問我幾多歲，我答十九歲，變咗洗腳水，呢個係人家畀我嘅名，好深印象。
A：貓 B：狗
答：貓，感覺若即若離，佢唔會成日黐住你，你想抱佢咩？佢又唔一定俾你抱，呢類性格同我好似。
A：影人 B：被影
答：我鍾意俾人影，影人唔一定影到想要嘅嘢，但係俾人影，就可以睇到人哋眼中嘅自己。
A：《Yes》 B：《100毛》
答：《Yes》！ 係屬於我年代，梗係揀《Yes》啦！
A：麥當娜（Madonna） B：安琪蓮娜祖莉（Angelina Jolie）
答：Angelina Jolie，因為我鍾意電影多啲，同埋佢係一個喺當代嚟講，敢言、果斷嘅女性，為世界帶出女性聲音。
A：香港 B：台灣
答：我會揀台灣，因為睇書、揀書，台灣好有閱讀氣氛，好多選擇。
A：劉德華 B：周星馳
答：我揀劉德華，因為我同佢合作過。
更多精采時尚內容，盡在 http://add.appledaily.com 。