快活谷乃不少華人練馬師主戰場，呢晚先有第二場「升力」幫鄭俊偉馬房開齋。到第四場四班1200米，輪到另一華倉何良打破齋缽，麾下「愛頑皮」夥拍梁家俊，藉一檔貼欄之利，由頭放到尾6.1倍勝出，截至此場全體24位練馬師之中，只係得番李廐未開齋，收過兩封成績唔達標警告信嘅李易達，唔可以再嘆慢板，否則隨時賠上了前途。
「愛頑皮」今場放返嚟贏，令一對後追馬「偉寶之星」同「薑餅人」難越雷池半步，分別後上只跑第二同第三。其中Icy黃婉曼丈夫馮柏基愛駒「薑餅人」，在騎師湯智傑胯下追足一條直路，一度看似有極大贏面，那知最後不但追不過「愛頑皮」，臨尾一步更輸條線給「偉寶之星」，結果「薑餅人」只是距頭馬一個頭位，但已ＷＱ齊撻，不過「薑餅人」仍是湯智傑新馬季首度上名。跑第四嘅係柏寶座騎「至尊駿爵」，四重彩派二萬五千幾。
何良指出「愛頑皮」的谷草性能其實很好，上季曾於谷草1200米得季軍，反映此場地合適。何良表示賽前對馬主莫達雄表明今仗機會突出，很開心順利掄元。