【本報訊】人心籌算自己的道路，由本來兩、三天的佔領中環，到餐風宿露79天；由當初以堵塞商業樞紐作威脅，到血淚披面仍然無功而還，夏愨、彌敦、軒尼詩，滿載失落的心靈、土崩瓦解的秩序，以及無法踰越的黑暗。向來言論辛辣的壹傳媒創辦人黎智英和巿民一起經歷嚴冬，直言走上街頭是為尊嚴而戰，事到如今不會怪責任何人，因為一切在主手中（hand of God），未來他會繼續抗爭，因為「香港人冇放棄嘅權利」。
佔領完結，曾經參與的人，要不行屍走肉，要不查找錯處，曾經大力勸說學生撤退的黎智英，似乎已經走完這兩個階段，「我唔覺得有邊個人係blamable（可指摘）㗎，可以埋怨邊樣嘢，整個運動我覺得好好呀，perfect（完美）」。沒有失望、沒有幻滅，向來「肉緊」的他，這刻說得超然，「唔等於話一次抗爭就得到效果，或者唔係即刻（有效果）」。
評年輕人
撤和留，是佔領者對罵的源頭，是世代間決裂的鴻溝，重看蹣跚的79日，黎智英形容整場運動是上主的安排，當中很多結果意想不到，「嗰件事差唔多意外發生嘅，it's hand of God，你要相信hand of God囉」。
他指整場運動無人策劃，情勢不受任何人控制，「喺嗰個情況之下冇得做好啲㗎喇，因為冇一班人係真係揸fit㗎，係學聯班細路仔去揸fit，你亦唔可以要求太高。」他強調不會回望，也不會鬧人，「冇意思囉，鬧邊個箒。做好自己，鬧人贏唔到，自己堅持信念，冇乜必要嘥時間去鬧」。他稱看到這麼多年輕人參與傘運，看到香港的希望。
談泛民
佔領後，社會瀰漫着對政黨的不信任，他批評近年有人刻意破壞泛民，「我唔想講名，有啲人叫自己做泛民，但一路喺度破壞緊泛民，收咗對家錢喺度搞泛民，呢一個咁嘅後果，造成好多巿民對泛民有誤解」。他認為市民應感謝泛民在佔領期間的付出，相信時間會證明一切。
說前路
政改走向死胡同，下一步應該怎樣做？黎智英直言沒有方向，但深信每個香港人，無論藍黃，都感到北京的壓力，大家冷靜下來，就會理解當時佔中的做法，「大陸咁樣壓落嚟，你估佢哋冇感覺咩？佢哋唔驚咩？」他認為世界進步，中國不能墨守成規，香港人團結爭取，終會看到真普選的一天。
否決政改，不少人思考是否移民，他強調不會離開，「我真係當呢個係我屋企，對呢個社會唔多唔少有個責任，因為呢個社會畀咗好多嘢我」。他感觸說：「我諗放棄唔係一個choice嚟㗎囉，任何嘢都係，逃避唔係一個選擇嚟，我哋冇放棄嘅權利」。
但事實留下來需要很大勇氣，「人生上好多嘢都好困難，唔通你唔守咩？一個人有絕症都有希望，佢都希望可以活下去，我哋都唔係絕症啫」。
■記者張嘉雯
