政治上，有啲事想順利獲得通過，可能要大鑼大鼓，引起傳媒注意，爭取輿論支持，但其實同樣有啲嘢，要順利通過，可能要靜雞雞，無聲無息通過咗就最好嘞。而呢一招，慣常見於公務員，花生友以下所講呢個個案，公務員最開心反而係建制派冇被驚動，泛民私下開心拍掌叫好。
花生友講緊嘅係兩個月前，立法會休會前通過咗《電子健康紀錄互通系統條例草案》，其中一個修正案係將條文中，將病人作出決定嘅「代決人」嘅定義擴展，政府建議「增加與醫護者接受者『同住』而在有關時間是陪伴該接受者的人士為該接受者的合資格代決人」。
係咪睇完水蛇春嘅條文，都唔知條條文講乜呢？簡單嚟說，條文一旦通過，同住嘅同性伴侶可以幫伴侶作出醫療決定，例如另一半已經陷入昏迷呢啲情況。何秀蘭發言時形容，呢項修訂，確立咗同性戀者有結合同組織家庭嘅需要。大家可以想像，一向反對同性平權嘅建制派議員例如梁美芬等，如果真係清楚條文內容，點會唔彈起反對？
睇番當日嘅紀錄，呢項修訂喺工黨何秀蘭一個人發言後，就即時表決，並獲過半數贊成通過，連記名表決都唔使，令負責呢項條文嘅公務員都鬆一口氣。呢一仗可能都係要讚吓政務官用詞幾咁精密，唔會令睇到反同、恐同嘅議員大放厥詞，呢位政界中人笑稱，相信呢班建制派連修訂條文講緊乜都未必知㗎，有時AO嘅功力真係不可小覷。
花生友
周二、四刊出