九月十九日星期六賽馬，新亞校友賽馬團體有隻「一片光明」出賽第九場一千米，自然要去捧場。呢隻「一片光明」上季2歲，新馬初出，兩戰兩勝，頓然成為「明星馬」，連「蘋果日報」嘅評馬專家都認為隻馬前途一片光明，故此今次轉3歲後第一次上陣，雖然已經評分高達67，編入第三班，有好多對手，仍然被捧為熱門之一。但係呢，根據賽後報告。「一片光明」入閘後十分煩躁，郁個不停，一出閘就不能向前跑，反為打橫撞向其他馬匹，又俾其他馬撞番轉頭，點樣可以集中精神嚟競跑吖，結果跑第七，令捧場客輸錢。老於經驗嘅名評馬人張福元老早指出，季出不宜捧3歲馬，果然有道理，唯有寄望隻馬逐漸長成，習慣吓同老馬競賽先啦。
沙圈有好多人，不乏商界工業界知名人士，輸完馬大家放完馬後炮，左丁山同一位廠家傾起：「喂，現在有政府消息人士向星島日報（九月十六日）放風，話明年一月梁特首會在施政報告提出取消強積金與遣散費及長期服務金的對沖機制，你點睇？」廠商即刻把幾火，破口大罵政府背信棄義，違反十幾年前成立強積金之前嘅承諾，左丁山話：「咪咁天真啦，嗰陣係董特首應承啲商家箒，佢屋企都係做生意嘅噃，現時係由梁特首當政，佢係無產階級出身，要應付工聯會追數吖嘛！」廠商好明白呢一點，但工商界絕不會躺死任梁特容易得逞，會發動工業總會、中華總商會、廠商會聯合會、中小企商會等等，向所有工商界功能組別議員施壓，若梁特真的要取消強積金對沖機制，會出全力阻撓。工商界議員不是全部係建制派咩，點樣反對政府呀？廠商話呢次冇得傾，必定要為此問題與政府割席，砌死罷就。咁講法，建制派會撕裂成工會派與工商派難以團結，梁特首如真心想取消對沖機制，可能要向泛民求救，請劉慧卿食飯求票先至可以搞掂立法會通過取消對沖機制，設想成班泛民議員操上禮賓府與梁振英摸茶杯底，場景都幾搞笑，如果真的如此，泛民唔乘機提出若干條件嚟交換，趁火打劫嘅話就係政治笨蛋咯。
星期一返工後，遇到一位老人家廠商，同佢再傾呢個問題，佢笑笑口話：「有人想連任，故意放風爭取民意及工人支持箒，佢會有對手㗎，但對手如果與商界相熟，得商界支持嘅話，佢咪可以逼對手表白對此事嘅立場，逼對手因而失民望囉，選舉工程已經開始嘞。」