【本報訊】一年過去，大夥兒氣未回，老人家本色不變，在大小聚會中嚷着要重啟政改，人人汗顏。傘運一年，天主教香港教區榮休主教陳日君樞機依然原則先行──總之落實普選，天經地義，他用考試做比喻，「交錯卷，唔合格，𠵱家應該補交」。重看整個行動，他自言沒做錯，包括一直呼籲退場，現時最希望民間團結，「希望佢哋（雙學）對我冇成見，因我一路都好坦白鬧佢哋」。
可惜政治不是講道理，阿爺也從來沒有把自己當成考生，這大半年來，多少人行屍走肉，如洩氣皮球踢不動，此時此刻爭取重啟政改，是否癡人說夢？「如果（中央）對香港理性啲、開明啲，全世界都會安樂啦」。若中央不顧國際形象又如何？「咁冇符啦，等大件事發生囉，咁將來咪打仗囉」。
打仗？「佢都驚，驚越來越控制唔到，佢知道嚟緊啲嘢（示威）唔會咁和平㗎喇，啲人嚐咗啲味道，覺得可以大規模（暴力）」。他認為中央盡早交出政改方案，可封殺極端分子，「𠵱家最麻煩有咗本土港獨呀，（這批人）係好細好少數，佢哋唔需要緊張，我哋唔贊成呢個」。
不滿雙學亂指揮
回想當日三子宣佈佔中，陳日君第一反應是「有冇搞錯呀！」主因是未執行李，「又話10月1號，我乜都冇準備㗎嘛，佢有張（清）單㗎嘛，要預備乜乜㗎嘛」。他匆忙趕到現場，就遇到學生質疑，「問我『你嚟做乜呀？』我話佔中開始，『佢叫你就出嚟㗎嗱？』原來佢哋唔贊成（佔中）喎，話佢哋hijack（騎劫）」。
時間越長，他和年輕人的分歧越大，旺角黑夜當晚，他本想在會議中表達意見，「𠵱家失控喇，我話不如我哋撤退啦，正委話，『主教你唔好講，人哋唔想聽，人哋會噓你』。我話噓我咪噓我囉，我老人家怕咩箒」。陳日君心中有氣，「我都唔想聽落去，我走開囉，上咗添馬公園，上面唔知幾好呀啲空氣」。
10月初，他提出建立七人平台，佔中三子一席、學生兩席、泛民政黨一席、工人代表一席、民陣一席，提出勝出方案的學者又一席，當然又無人理會。對雙學不聽老人言，他甚為不滿，「同學生溝通，成日好夜先嚟，嚟到又好眼瞓」。他指當時大會的糾察和物資均由佔中三子分配，但學生並不感恩，「佢哋自己（學生）指揮，太興奮，嗰時係錯㗎，係亂」。
問他自己有沒有地方要檢討，他說：「冇呀，我被動呀，我都影響唔到（件事）。」話雖如此，但早前學生被捕，他又去警署聲援，「佢哋（政府）好衰呀，佢哋好陰濕，會話你損失好多嘢㗎」。又說，「都黐線㗎，咁打人嗰七個（七警）呢，幾時告佢哋呀？真係好離譜喎」。
冀學聯重新組織
80歲和20歲，相差豈止3年又3年，火大老人氣上心頭，大鬧一頓，但其實內心柔軟，「希望佢哋對我冇成見啦，因為我一路都好坦白鬧佢哋㗎」。記者笑說日後監倉見，年紀較大的他隨時捱不過，他又激動說：「我哋鍛煉過㗎，好刻苦㗎，最緊要有書畀我睇。」
傘運無功而還，「陳伯」理解有巿民感到絕望，「我就唔會放喺心裏面，我爆咗就舒服㗎喇，谷住就唔好，谷住就會爆血管，我就唔會爆血管，我叫人哋爆就有份」。記者點點頭。他隨即大罵政務司司長林鄭月娥和律政司司長袁國強「冇靈魂」，早前更發文諷刺袁是「強國猿」。
記：「呢個詞你邊度學番嚟㗎？」
陳：「報紙咪有囉。」
記：「……」
陳：「好衰喎，初初都睇唔出，個樣都幾斯文……有時真係好激氣，好彩我唔識講粗口箒，識講已經講咗㗎喇，唔好教我呀！」
記：「我唔會教你，你太容易學壞。」
陳：「我唔使你教，我識上海粗口，上海粗口好犀利。」
面對泛民內訌，社運組織失去支持，陳日君仍然認為佔中三子是帶領下一波運動的最佳人選，「我對佢哋好有信心，好理性，學聯就要重新組織得好啲」。他指佔領時「立立亂」，不滿意學聯的領導，大可修改章程，「下次做好啲咪得囉，團結是力量，唔好分散呀，退出咗都可以加入番箒」。
■記者張嘉雯