香港潮屬社團總會下月8日至12日豪擲350萬，喺中環遮打花園舉辦首屆「香港潮州節」，除咗有攤位提供滷鵝、熏鴨、牛丸、魚蛋等傳統潮州美食，仲請嚟一眾城中「架己冷」撐場，包括高登仔好like嘅周秀娜以及天后鄭秀文，大家怕且都要飲定功夫茶，見到靚女前定一定神。
主辦單位透露，娜姐會喺下月11號，與同屬「潮人」嘅醫管局前主席胡定旭真情對話，交流有關潮州嘅童年回憶同埋奮鬥歷史，唔知屆時會唔會分享埋食雪糕心得？據知鄭秀文亦會以特別嘉賓身份現身，但具體日子就要保持神秘喎，睇嚟係想大家去多幾次捧場。但兩位潮州妹特別以潮州話為活動錄嘅短片，則已經喺香港潮州節嘅facebook有得睇嘞。
特區政府內都有唔少「潮」人捧場，人稱「民望高」嘅食物及衞生局局長高永文，會與同樣係潮州人嘅食衞局副局長陳肇始嚟個「潮人廚房」，怕且都係悉心炮製潮州美食。
岳少黎明上身爆金句
身為總會監事會主席、一向識飲識食嘅旅發局主席林建岳噚日都有現身記招撐場，岳少期間仲同一眾「架己冷」飲潮州功夫茶，再一邊篤魚蛋同墨魚丸等等。八方問岳少，平日鍾意食乜嘢潮州嘢？佢畀咗個黎明金句式回應：「好食嘅就鍾意食，唔好食嘅就唔鍾意食」。
李八方
mailto:[email protected]
