「為咗隊波，輸咗個家」，呢個唔係反家暴廣告嘅宣傳口號，而係阿仙奴領隊雲格嘅寫照；法國傳媒報道，雲格已經同老婆安娜搞離婚，而且分居咗一段時間，雲格仲透露因為工作壓力太大，影響到家庭生活㖭。
壓力大影響家庭生活
雲格嘅法國老家斯特拉斯堡報章周二就報道呢位阿仙奴領隊離婚嘅消息；65歲嘅雲格同59歲嘅安娜拍咗拖好耐，仲有一個18歲嘅囡囡，不過佢哋直至2010年12月先結婚，但呢段婚姻真係短暫，據報佢兩個今年六月已經開始分居，目前正辦理離婚手續。阿仙奴球迷成日都插雲格孤寒、唔使錢擴軍，再奪英超冠軍遙遙無期，不過今次就唔好怪雲格嘞，事關雲格因為工作壓力大，搞到家人承受好大壓力。
唔好睇雲格年薪高達800萬鎊（約9,500萬港元），喺世界球壇亦甚具威名，雲格就自爆過領隊辛酸史；話球季一開始就真係忙到震，一至五就要帶隊練習，周六或日亦都有比賽，如果球隊出戰歐洲賽，更加要周圍飛，唔似得一般打工仔，星期六、日可以同家人享受天倫樂。而且雲格向安娜開出期票，98年已經講過做多五年就退出球壇，點知好似《無間道》嘅陳永仁咁，五年又五年，到今時今日仲帶緊阿仙奴，亦都未有退休計劃，點會唔令安娜心灰意冷。
不過英國《太陽報》就爆料，雲格同安娜婚姻之前都唔係順風順水，曾經傳出法國性感女歌手泰達（Sonia Tatar）介入，可能係小三搞到離婚收場。不過點都好，雲格都係負責任男人，已經做好財產分配安排，安娜同囡囡未來嘅生活應該無憂喇！
難學費Sir兩者兼得
世界球壇有唔少領隊同教練都婚姻失敗，好似德國大帝碧根鮑華就經歷三段婚姻，據報碧根鮑華球場「惡慣」，喺屋企都好大男人，搞到老婆要離婚，連帶佢嘅子弟兵馬圖斯同禾拉都離婚；不過世事無絕對，同雲格喺英超鬥生鬥死嘅前曼聯領隊費格遜出名錫老婆，費Sir喺2013年退休，仲話係為咗老婆㖭！