隔牆有耳：
自紮燈籠　呃like又好玩 - 李八方

中秋節傳統燈籠買少見少，近年潮興手作人開班教大家用竹篾、藤芯或者鐵線「自紮」紙燈籠，同核突膠燈籠講拜拜。平面設計師阿Mo 6年前紮咗個卡通燈籠𠱁朋友開心，意外獲狂like，促使佢最終開班授徒，教人圈藤芯、對位、鋪棉紙，實行「自己燈籠自己紮」，佢話希望後生仔女都重拾玩燈籠嘅興趣。

今年第一次搞月亮展覽嘅N_Store就同其他手作人合作，教人自紮月亮燈籠，「月亮自己一個孤伶伶，好似好慘咁，希望大家會記番起佢嘅存在，就算一個人過中秋節，都可以好好享受月光美態」。不過，月亮燈籠用硬繃繃嘅竹篾整，佢提醒參加者要小心包實接駁位同彎位，唔好整親手仔啦。