大後日就中秋節喇，隔兩日又到國慶，節慶當前，卻係擔心多過開心。儲局議息後按兵不動，主席耶倫玩彈弓手，臨時加入要考慮新興市場，尤其中國的經濟情況，暫時唔加息。中國經濟有幾不濟？昨日公佈的PMI數據可見一斑。9月財新中國製造業PMI初值跌至47，已連續7個月低過榮枯線，更創六年半低位；產出、新定單、就業都跌，顯示內需、外需都弱。
事實上，繼中國社科院預測今年增長只得6.9%，未能保七後，亞洲開發銀行前日亦將中國今年增長預測調低至6.8%，係兩個月內第二次下調。不過，國家主席習近平訪美前就大派定心丸，對《華爾街日報》話中國可保七。
習近平訪美首站係巨企雲集的西雅圖，昨日就上演戲肉——北京遇上西雅圖，雖然市場憧憬會有利好股市消息，但PMI數據唔掂，中港股市攬住跌超過2%。其實數據唔係重點，淡友要開戰的話，乜理由都可大開殺戒，下個星期二就期指結算喇！
大行唱好中國海外
中央為挺經濟，已不停出招，包括挺樓市，皆因房產作為全國最大產業，周邊產業鏈龐大，牽涉上下游超過50個行業如建材、電器、家具等。國家統計局公佈的8月樓市數據顯示，70個大中城市新盤售價16個月以來首度出現半數環比錄得升幅；同比則9個錄得升幅，包括北京、上海、廣州、深圳，係11個月以來最多，深圳升幅更達三成，可見一線城市已率先復蘇。
內地樓市回暖，利好內房股收益。內房股上月隨大市下跌近12%，已反映人民幣對美元轉弱的影響。唔少內房股近一、兩年都股價偏低，但派息唔錯，既具防守力又具上升潛力，係趁低吸納之選，但我只會揀穩陣的內房龍頭，心水係中國海外（688）。
中海外上半年核心盈利按年升兩成，毛利率及財務水平係同業中最好，主要受惠於母公司注資。上月合約物業銷售額按月升近一成，又剛在南昌及深圳買了兩幅地。
集團亦睇好港澳樓市，指剛性需求大，會繼續投資。至於分拆中海物業在港上市，則仍在準備中。德銀、巴克萊、高盛、摩通早前都發表報告睇好。中海外近日在22元水平築底，昨收報23.35元，可吼位買入，目標價28元，止蝕價22元。
割柑人
本欄逢周四刊出