車路士星期二收到兩個壞消息，隊醫伊娃已經唔撈，仲計劃告藍戰士，而前鋒迪亞高哥斯達（上圖右二）就被足總秋後算賬，要停賽三場。
伊娃唔撈要告車仔
英國《每日郵報》話，車路士叫伊娃上星期五返工，但伊娃就冇出現。據消息人士講，伊娃已經辭職，同埋聯絡緊一啲熟悉勞工法例嘅律師，希望可以告車路士；坊間好多人都撐伊娃，例如有英足總董事對於伊娃離開感到傷心。喺車路士對史雲斯場波，伊娃同同事衝入場治理受傷嘅夏薩特，但被領隊摩連奴批評唔識波，摩帥賽後仲罰伊娃。據報，摩帥嗰陣喺場邊有爆粗鬧伊娃，仲分分鐘會被秋後算賬，或者會停賽。講起秋後算賬，點可以唔提迪亞高哥斯達（DC）呢！DC喺對阿仙奴場波攻擊哥斯尼，球證睇唔到，但英足總賽後覆核，認為DC呢啲係暴力行為，罰佢停賽三場，DC除咗唔踢得噚晚場英聯盃，嚟緊聯賽對紐卡素同修咸頓都冇得上陣。