中秋節同國慶長假期話咁快就到，唔少商場都要諗諗計，睇吓喺零售淡市下，點樣谷起人流同生意。
向來好揼本做宣傳嘅中環ifc商場，從奧地利請咗班藝術家，飾演多位已故、改變世界嘅傳奇人物演出，到時喺Apple Store門口撞見Steve Jobs，大家唔需要驚訝。
10位傳奇人物，除咗蘋果教主Steve Jobs，仲有天才科學家愛因斯坦、發明家愛迪生、法國時裝設計師Coco Chanel、音樂家莫札特等。ifc話，呢班藝術家會好似石像咁，有時企喺舞台上，有時又會忽然活生生咁，透過行為模仿同肢體語言，同觀眾和路人互動。
流動劇場由9月25日開始，費用全免。公演日期咁啱撞正iPhone 6s Plus首日開售，到時搶到新手機嘅果迷，或者可以同Steve Jobs嚟番張selfie！