「保誠香港網球公開賽2015」下月舉行，長30秒嘅宣傳短片喺YouTube有得睇，片中人士身手好敏捷，無論攞住鑊鏟、電筒甚至手袋等，對飛埋嚟嘅網球一擊即中。
有眼利網民就發現，片中其中一個飛身接靚波嘅OL（圖）好面善，極似民建聯小花呂迪明。演藝戲劇表演系畢業嘅佢，以前都有做過舞台劇、亦拍過電影，唔通佢已經放棄從政、轉行瞓身投入演藝事業？八方問過呂迪明，證實片中人真係佢，佢話本身打網球唔叻，冇特別加操，靠演技搭夠，笑笑口話好在打緊泰拳，「身形都算比較fit」。據聞有公司見到佢CV，搵佢試鏡就得咗。