雖然網上商店生意對香港零售商嚟講，真係只得九牛一毛，但好多公司仍然前仆後繼跟內地嘅大型電商合作。聞說莎莎（178）就快會同京東簽訂合作協議，不過應該都只係上架賣產品咁大把。
莎莎喺開拓內地網民市場方面，一直做咗好多功夫，早排先公佈同騰訊（700）旗下微信合作，轉頭又同騰訊對家阿里巴巴支付寶搞支付系統，家陣仲準備同京東簽約，真係食晒咁多條水。
聽聞今次合作，只係莎莎將產品放上京東網站賣，希望到時唔好雷聲大雨點小喇。
話時話，一講到京東，大家自然想起41歲老闆劉強東，跟22歲靚女「奶茶妹妹」章澤天嘅戀情，好似話兩個人上月已經拉埋天窗，如果劉老闆搵埋奶茶妹妹幫莎莎做推廣，咁就真係不得了。